حماتي والكلب

وقبل ما نبدأ حكايتنا اعرفكم علي نفسي انا اسمي ساره عندي عشرين سنه بيقولو عليا حلوه وهاديه وكلامي قليل وبسمع الكلام وطيبه امي خلفتني علي تلات ولاد كنت اصغر واحده وكنت مبسوطه بحياتي لحد. ما جه وقت اني ادخل الاعداديه بس اللي حصل وقتها..
عادل
انتي ايه اللي بتقوليه ده يا سماح بقي عايزه بنتك تكمل تعليم وتدخل الاعداديه ناقص كمان تقوليلي خليها تخش الجامعه لما تكبر..
سماح
وفيها ايه بس يا عادل المدرسين بيقولو عليها شاطره تخيل بقي لو بقيت دكتوره او مهندسه ا..
عادل
واحنا بنتنا هتبقي دكتوره منين واحنا ظروفنا علي قد حالنا وبعدين علميها شغل البيت عشان لما تتجوز وتتعلق برقبة راجل تعرف تفتح بيت..
سماح
طيب البت متعلقه بعلامها طيب حتي تاخد الاعداديه حرام علينا نبقي علمنا اخواتها الولاد وهي لا..
عادل اتعصب وقال
ولا كلمه كمان يا ام عبد الله الكلام انتهي هنا البت اصلا تقعد في البيت ما تشوفش الشارع تاني قال علام وصرمحه وقلة ادب..
في الوقت ده انا كنت واقفه ورا باب اوضتهم كنت طفله شايفه حلمها الوحيد بيتدمر قدام عينيا حقي في اني اتعلم وابقي زي بنات جيلي انتهي قبل ما يبدأ بسبب ابويا وتفكيره ان البنت مالهاش غير البيت..
وقعدت في البيت وفضلت كل يوم اقف اتفرج علي صحابي من الشباك وهما رايحين المدرسه ما فيش يوم بيعدي عليا غير وانا بعيط بسبب حرماني من التعليم ولما بقي عندي 18 سنه رجع ابويا واخويا الكبير من بره وكانو فرحانين جدا وقالولنا...
عادل
تعالي يا سماح احنا خلاص هنسافر القاهره..
سماح
نسافر ونسيب بلدنا ليه كده بس يا اخويا..
عبدالله
يا امي ده احنا لقينا شقه حلوه اووي في حته نضيفه في القاهره وكمان ابويا هيفتح محل قماش كبير هناك واخواتي هيكملو الكليه وانا لقيت شغل في شركه كبيره..
سماح
والله لو انتو شايفين ان ده صح انا ما عنديش مشكله..
عادل
يبقي علي بركة الله وانتي يا بت يا ساره قاعده ليه كده قومي روحي جهزي العشا واتحركي كده ما تتعوديش علي القعده...
قومت بسرعه وقولت
حاضر يا بابا علي طول اهو هجهز العشا...
انا دخلت المطبخ وامي قالتله
ما براحه يا عادل علي البنت دي يا حبة عيني بقيت لا بتتكلم مع حد. ولا زي البنات علي طول ساكته ولو فضلت علي حالها ده مش هتنفع في الدنيا..
عبدالله
بالعكس يا امي ده هتنفع جدا انا اختي هاديه ومؤدبه طيب ده البلد كلها بتحلف باخلاقها..
عادل
اهو ولدك قالك انتي بس خليكي بره الموضوع ده وانا بنتي عجبااني وهي علي الحال ده...
انا كنت ديما بسمع وانا ساكته حتي اني لما روحت معاهم القاهره انا فكرت ان خلاص حياتي هتتغير واقدر اطلع وادخل براحتي بس لقيت العكس ولما وصلنا اللي حصل..
عادل
بقولك ايه يا سماح انتي ابقي انزلي معايا المحل..
سماح
طيب والبيت مين هيرتب ويروق وانت بترجع من المحل الساعه سته المغرب..
عادل
تقعد ساره في البيت وابقي انا اجي اشوفها وارجع وانتي كمان وانتي بتجيبي الغدا..
ساره
طيب ما انزل انا معاك يوم يا بابا وامي يوم..
زعق فيا اخويا عبدالله وقال
اخرسي يا بت انتي قال تنزلي قال عايزه تتصرمحي هنا طيب والله يا بابا لو البت دي نزلت الشارع من غيري انا او اي حد. من اخواتها لانا ماشي ومحدش هيعرفلي طريق انا اختي ما حدش يشوفها..
عادل
عجبك كده زعلتي اخوكي انتي مين قالك تتكلمي غوري ادخلي جوه يلاااا..
دخلت اوضتي وفضلت ابكي وبقيت فعلا قاعده في البيت لوحدي اروق واطبخ واكنس وامسح بس اخواتي كنت بالنسبالهم شغاله مش بيتكلمو معايا غير لو كانو محتاجين حاجه..
وفي يوم كانو اخواتي قاعدين بيتكلمو ورحت قعدت معاهم لقيتهم سكتو فقولت..
ساره
ليه سكتو انا جايه اتكلم معاكم..
عبد الله
تتكلمي معانا في ايه انتي بتعرفي تتكلمي اصلا..
احمد اخويا
وبعدين احنا بنتكلم في كلام رجاله ما ينفعش تقعدي معانا مش هتفهمي حاجه ومش هنعرف نتكلم قدامك..
سيف
بقولك ايه يا ساره اعمليلنا شاي وبعدين اكويلي القميص الرمادي عشان اروح بيه بكره الكليه..
ساره بدموع
حاضر يا سيف بعد. اذنكم...
وانا وداخله المطبخ سمعت سيف قال
اديني اهو وزعتها قال عايزه تقعد تتكلم معانا بعد كده تقول عايزه تنزل تشتغل كمان..
عبدالله
طيب دا انا كنت كسرت رقبتها هي ما هتشوف الشارع اصلا