مراتي بتضيع مني

من الأيام كلمني وقالي تعالى أنا عايز أشوفك.
نزلنا اتقابلنا على القهوة بتاعتنا بعد السلامات المعتادة والله العظيم قالي كده بالحرف
هو لو حد بيتأسف لك علشان هو تعبان ومش عايزك تشوفه بحالته دي علشان ميتعبكش بتعبه ده يبقى إيه
بيتأسف ليك علشان ڠصب عنه معملش لك أي حاجة حلوة ده يبقى إيه
فأنا سكت شوية ومردتش عليه بسؤال قولتله يعني حب حب كبير.
قالي مراتي بصت لي لما جيت من الشغل وقالت لي أنا أسفة.
استطرد في سرد كلام كتير أوي بعدها وقالي في النهاية والله العظيم أنا ما حبيت حد كده ولما قالتهالي حسيت إني أنا اللي مريض مش هي وإني عايز أتأسف لها مش العكس.
صاحبي لما كان بيحكيلي مكنتش أنا لسا تزوجت وهو كان السبب الأكبر في إني أتزوج بالرغم من كل المصاعب اللي شافها في الأول.
لا شوفته زهقان ولا بيتعصب ولا بينقم على حاله والله العظيم!
كان كل حاله إنه زعلان على مراته.
لسا يا دوبك اتقفل عليهم باب وكام يوم والله لقيته بيكلمني يقولي عاوز اسم دكتور كويس عندك لعلاج كذا..
رباط قوي متين اتنشأ من كام يوم بس!
صاحبي مكنش عارف مراته قبل الزواج علشان نديله أسباب يعمل معاها كل ده!
هو ارتبط معاها برباط غليظ اسمه الزواج واتقى الله فيها وحبها حب حلال نقي لا يمكن كسره!
مراته بإذن الله بعد التعافي هتبقى شيء تاني تماما هتبقى سند وظهر وكل شيء.
نتقي الله في نفسنا وفي الأرواح اللي خدناها من بيوت الناس ونعاملها أحسن المعاملة.
نتقي الله في أزواجنا ونحافظ عليهم.
نحافظ على أدعيتنا وأذكارنا ونفكر شريك حياتنا دايما بطاعة الله علشان تجتمعوا دايما على حبه.
وافتكر دايما مفيش أعظم من الحب الحلال.
مفيش حاجة في الدنيا أعظم من إنك تتقي الله في شخص بتحبه.